Kea ‑nʋa' dɩ ‑wee'‑ "klein 'a 'nynɩ ‑sa ‑dʋ
104
'Ma ‑suu ɛ 'bɛɛ‑ Tʋ "bo 'a 'nynɩ "i.Tʋ "bo, 'ma Kea,
Ɛ "bɛi ɛ se sie 'ɩn kɔn‑!
Ɛ ‑kɔ nyɔ ‑paa 'bai" ɛ nʋa blɛblɛ‑ ‑wɛe ‑ɛ nmɔ "jrii 'ʋn;
2 ‑sɔn' mɛ ‑nɩ ɛɛ' 'ʋn paadɛ‑.
Ɛ ‑gbai' i jaʋn 'mɛ, ka nyɔ ɔ poa poo" "jɛi ɛ.
3 'De "ni "jru kpɔ', 'bo ‑ɩn po ‑ma Tʋ "bo ‑gbu;
‑ta nyɔ sea nynia' 'bɛɛ‑.
Bue" mɛ ‑nɩ ‑ma "kpei naadɛ‑,
pooɔ' mɛ ‑ɛɛ naa nɛ.
4 Pooɔ' mɛ ‑ɛɛ kpa ‑ma wlu ‑ta,
"sɩɩ‑ ‑ɛɛ ‑sia', mɛ ‑nɩ ‑ma ‑tadboi‑.
5 Ɛ ‑teɛ' 'blʋa 'de ɛɛ' ‑gban "kpei,
ɛ se i ‑suua' i 'nɔ 'kmʋ.
6 Ɛ "fiɛn ɛ "ni pɛʋn‑ "jrui,
ka 'ʋnpaadɛ klaa" nɩa,
"ni 'jaa' mamaʋ 'sʋ 'de crʋ "jru.
7 Ɛ plaan" 'sʋ ɩ ‑criiɛ kɩɩn,
ɩ ‑wee'‑ pleɛ "juɛi.
8 Ɩ jiiɛ crʋ "jru i, ɩ pleɛ wlao 'dii,
ɩ je mu mamaʋ 'sʋ,
‑ta ‑ke ɩ ‑koa' "i ɩ je 'e nyni.
9 Ɛ poɛ ‑paʋn "ni sea 'ple i,
‑wɛe ɛ sea 'blʋa "jrui "muu‑ i 'bode ɛ.
10 ‑Mɔ ‑nʋɛ' ‑wɛe "ni 'a 'wlʋ 'e wlao 'di,
‑wɛe ɛɛ ‑si' 'de crʋ 'nynɩ i.
11 Ɩmɩ kwladi' nmi a 'na,
'bomɔ ‑gbaa" 'di soofae'‑ 'a ‑sa "ni na tʋn‑.
12 Nʋɩ "tiɛ "ni "wɛin,
‑wɛe ɩa ble 'de ti dae‑ jai.
13 'De "jɛi ɛ nɩa, ɛɛ 'wooa "ni crʋ "jru i,
‑wɛe 'blʋa a di ɛɛ' nʋʋdɩ 'a crɔn'.
14 ‑Mɔɔ mɛɛ sii" 'de nɔ" dɩ 'a ‑tɩ' 'ʋn,
‑wɛe 'blʋa nmɔ‑, ‑wɛe nyiɔɔ 'je 'e diiɛ ɔɔ di.
15 Nmɔ ɔ poɛ nyʋ 'mʋa‑ pɛe o,
ɛɛ fɩɩɛn "juua, ɛ e 'cna ‑tua" ‑sii,
'de diidɛ mɛ ‑ɛɛ kuu nyɔ 'ɔ pɛe i.
16 Ka tɛn' "jia 'de "ni "wɛin tu 'ʋn ɛ,
'kamɔ Sɛtrɩ‑ ‑tu ‑ɩn ‑doa 'bo Diban nɩ‑,
'oo Tʋ "bo.
17 Ɩmɩ nʋɩ a poo 'jro jai,
'de siplɛ tu ja, mɔ ‑koo' "kpei nawɛ ɛ ‑te'.
18 Koo' "tiɛ 'e crʋ ‑tɛan ja "jru.
Wla "ti 'de "soi 'a ‑kwlewɔn 'di.
19 Ɛmɛ ‑nʋ' 'cʋ ‑wɛe ɛ 'je ‑kwɔɔ' nɔ" "kpei ‑seea'‑.
'Jrʋ juuo ɛɛ' i blu "nɔ 'mɛ.
20 Ɛmɛ ‑ɛɛ ‑wlaa' ‑fli, ‑wɛe kwie 'a kpʋn.
‑Wɛe dɩ "klein ‑nɩa 'de 'kwlae‑ 'di a ‑sii' 'ʋn:
21 ‑Plaanynʋɩ a klu',
ɩa ‑pɔn ɩa' diiɛ i 'de Kea 'kwa.
22 ‑Bo 'jrʋ sɔn 'ʋn 'sʋ ɛ,
ɩa ‑crie' ɩa' ‑cɛ" 'mɛ,
‑wɛe ɩa 'pɛn i 'de ɩa' ‑gblo" 'di.
23 'Sʋ nyiɔ ɔ sɔn 'ʋn ɛ, ‑wɛe ɔɔ nʋ ɔɔ' dbo
mamaʋ 'sʋ kwie a jea kpʋn.
24 'Oo Tʋ "bo, ka ɛɛ' nʋʋdɩ ‑ti kaa‑!
Ɛ nʋɩ ‑wee'‑ "kein 'mɛ, 'de tɔ' 'di nɩa' 'ʋn.
Ɛɛ' 'dɔe 'a 'sʋ "ji 'blʋa 'mɛ.
25 Tɔniɛ klaa" ‑mua' pɔu 'sʋ ‑mɛ ka,
'de ɛ wɔn 'de mɔ nmi klae'' ke,
mɩɩ" a ‑sii 'ʋn, ‑mɩ se ‑sro' ‑ta 'ble.
26 'De ɛ "kpei 'de mɔ ‑pato' a ‑sii 'ʋn,
‑wɛe "niɔ ‑ci ɛ nʋa, ɛɛ ‑fa" i 'de "ni "kpei.
27 Dɩ ‑nɩa 'mʋʋa‑, ɩ ‑wee' "klein tbɛ ɛ tɔi",
‑wɛe ɩ ‑wee'‑ 'je ɩa' diiɛ 'je 'de nɔi".
28 ‑Bo ɛ "nyɩ 'sʋ: ɩ kpʋn ɩ',
ɛ 'baia kwa 'sʋ "diwan‑ kpʋn 'ɩ.
29 ‑Bo ɛ ‑saa "juua ‑jei" 'sʋ, ɩa' dɩ a crɛ'. Ɛɛ ‑sɩ
feeɛ' 'ʋn, 'sʋ ɩ 'mɛɛ,
ɩa muɛ 'e 'blʋ 'ʋn 'de.
30 ‑Bo ɛ po 'e feeɛ' 'sʋ ɩ nɩ',
‑wɛe ɛɛ po 'blʋa ‑wee'‑ 'a ‑gbɔo ‑dee "ni.
31 Tʋ "bo 'wlʋ 'nynɩ jeejee:
Ɛ nʋ 'mʋa‑ 'de ɛɛ' nʋʋdɩ 'a ‑tɩ' 'ʋn.
32 ‑Bo ɛ ‑gbʋʋn' i 'sʋ 'blʋa crɛ',
‑bo ɛ bla crʋ "i 'sʋ dao' a "bu i kwii.
33 ‑Ta 'ɩn nɩa 'kmʋɛ ɛ,
'ma muɛ dɩ blaa' 'ɩn 'je ble,
'ɩn 'je Tʋ "bo 'nynɩ ‑sa.
34 'Ma blewlu 'jeɛ doun" 'dii nmɔɔ‑!
'Ɩn nɩɛ "i 'ɩn 'je Tʋ "bo 'mʋa‑ ɩ nʋʋ‑.
35 'De dɛsaʋnʋʋ ‑mʋ sɔn i 'de 'blʋa "kpei.
‑Wɛe 'diwɔnyniʋn 'bo 'kmʋ nɩɛ,
'Ma ‑suu, po Tʋ "bo "diwan‑.
Kɩɩn, ao 'bɛɛ‑ Tʋ "bo 'a 'nynɩ "i.